समाचार विदेश

आतंकवाद विरुद्ध लड्न र युक्रेन विवाद समाधान गर्न ईयूलाई भारतको आह्वान

आतंकवाद विरुद्ध लड्न र युक्रेन विवाद समाधान गर्न ईयूलाई भारतको आह्वान

 

न्युयोर्क- भारतले शुक्रबार ईयूलाई आतंकवादविरुद्ध सामूहिक रूपमा लड्न आह्वान गरेको छ। संयुक्त राष्ट्र संघमा शान्ति र सुरक्षा चुनौतिहरू समाधान गर्न युक्रेन द्वन्द्व समाधान गर्नुपर्ने आवश्यकतामासमेत भारतले जोड दिएको छ। 

संयुक्त राष्ट्रका लागि भारतका उप दूत आर रविन्द्रले भने, 'आतंकवाद र अन्य नयाँ तथा उदीयमान चुनौतीहरू विरुद्धको हाम्रो निरन्तर लडाइँमा ईयूको महत्त्वपूर्ण भूमिका छ। भारत प्रतिआतंकवाद समिति र सन् २९८८ प्रतिबन्ध समितिको अध्यक्ष हो। यस क्षमतामा भारतले ईयूलाई आतंकवाद विरुद्धको हाम्रो लडाईलाई सामूहिक लडाइ र 'शून्य सहिष्णुता' को साथ लड्न र त्यस लडाइँम समर्थन बढाउन आह्वान गर्दछौं।' 

उनले कोभिड–१९ महामारी र युक्रेन द्वन्द्वको विश्वव्यापी प्रभावलाई प्रकाश पार्दै संयुक्त राष्ट्र संघ र क्षेत्रीय संगठनहरूबीचको साझेदारी र सम्बन्धलाई सुदृढ गर्नुपर्नेमा जोड दिए। 'विश्वले शान्ति र सुरक्षा चुनौतिहरूको सामना गरिरहेको छ, जुन कोभिड-१९ महामारी, युक्रेन संकट र यसको फलस्वरूप खाद्य र ऊर्जा सुरक्षा चुनौतीहरूले बढाएको छ। यसले विश्वव्यापी दक्षिणमा असमानतालाई असर गरिरहेको छ।'

'हामीले संयुक्त राष्ट्रसंघको बडापत्रको अध्याय ८ अनुसार संयुक्त राष्ट्र र क्षेत्रीय संगठनहरू बीचको साझेदारीलाई बलियो बनाउन र सम्बन्ध बढाउन आवश्यक छ। हामीले हाम्रा साझा चुनौतिहरू पार गर्न अझ बढी अन्तर्राष्ट्रिय सहयोग र ऐक्यबद्धता पछ्याउन आवश्यक छ,' रविन्द्रले थपे।

उनले युक्रेन र रुसी महासंघबीचको द्वन्द्वको अन्त्यका लागि वार्ता पुनः सुरु गर्नेलगायत सबै कूटनीतिक प्रयासलाई भारतले समर्थन गर्ने बताए। 'द्वन्द्वले व्यापक क्षेत्रीय र विश्वव्यापी प्रभावका साथ अस्थिर प्रभाव पारिरहेको छ। बढ्दो तेलको मूल्य र खाद्यान्न र मलको अभावले विश्वव्यापी रुपमा असमान प्रभाव पारिरहेको छ। युक्रेन संकटले कमजोर देशहरूमा बसोबास गर्ने मानिसहरूको दैनिक जीवनमा परेको प्रतिकूल प्रभावलाई कम गर्न ईयूले अग्रणी भूमिका खेल्नुपर्छ।'

उपराजदूतले बहुध्रुवीय विश्वमा सुरक्षा समृद्धि र दिगो विकास सुनिश्चित गर्न भारत र ईयूको साझा चासो रहेको पनि बताए। 'भारतले बहुपक्षीय सुधारको आवश्यकताको वकालत गरेको छ। हामी संयुक्त राष्ट्र सुरक्षा परिषद लगायत विश्वव्यापी बहुपक्षीय संरचनाको अर्थपूर्ण र व्यापक सुधारका लागि आह्वान गर्दै आएका छौं। संयुक्त राष्ट्र र बहुपक्षीय प्रयासहरूको मूलसँग विश्वव्यापी चुनौतीहरूको सामना गर्न ईयूको महत्त्वपूर्ण भूमिका छ।

'जलवायु परिवर्तन र दिगो विकास लक्ष्यहरूमा विश्वव्यापी बहसको प्रगतिमा ईयूको योगदान उल्लेखनीय छ। हामीले विकासोन्मुख देशहरूलाई बोझ नराखी यी चुनौतीहरू सामना गर्न जारी राख्‍न सन्तुलित दृष्टिकोण खोज्‍नुपर्छ,' रविन्द्रले भने।

ADVERTISEMENT