समाचार

बलात्कारको उजुरी दिने किशोरीलाई ३ वर्ष ६ महिना कैद

बलात्कारको उजुरी दिने किशोरीलाई ३ वर्ष ६ महिना कैद

पछिल्लो समय मुलुकमा बलात्कार तथा यौन हिंसाका घट्ना वढिरहेका छन्। यस्ता घट्ना हरेक वर्ष वढ्दो क्रममा रहेको तथ्यांकहरुले देखाउँछ। तर, कतिपय घट्ना भने आफुले भनजस्तो नभएपछि दुःख दिने मनसायले पनि यस्ता घट्ना वाहिर ल्याउने गरिएको पुष्टि भईरहेका छन्।

अछाममा यस्तै एउटा घटेनामा अदालतले बलात्कारको मुद्दा दिने किशोरीलाई नै जेल सजाय सुनाएको छ। सहमतिमा यौन सम्बन्ध राखेर बलात्कार गरेको भन्दै उजुरी दिएकी १९ वर्षे किशोरीलाई अदालतले ३ वर्ष ६ महिनाको जेल सजाय सुनाएको हो।

जिल्ला न्यायाधीश नवीनकुमार जोशीको इजलासले उजुरीकर्ता किशोरीविरुद्ध नै बलात्कारको झुटो उजुरी दिएको अभियोगमा जेल सजायको फैसला सुनाएको हो। विवाह गर्न भनेर घरमा माग्न आएका रामारोशन गाउँपालिका २० का युवकले ०७८ माघ १५ गते आफूलाई बलात्कार गरेको भन्दै किशोरीले प्रहरीमा उजुरी दिएकी थिइन्।  

तर, मुद्दाको पुर्पक्षका क्रममा दुवैले सहमतिमा नै यौनसम्बन्ध राखेको पुष्टि भएको छ। युवकलाई झुटा मुद्दामा फसाउन खोजेको भन्दै अदालतले किशोरीलाई कैद सजायको फैसला सुनाएको अदालत प्रशासनले जनाएको छ।

किशोरीले प्रहरीमा दिएको जाहेरीमा माघ १५ गते राति करिव साढे ११ वजे आफूमाथि जबरजस्ती गरेको उल्लेख गरेकी थिइन्। आमासँग विवाहको कुरा गरेको र राति आफ्नै कोठाको भुइँमा सुतेका युवकले खाटमा सुतेकी आफूलाई तानेर जबरजस्ती करणी गरेको किशोरीले उजुरीमा उल्लेख गरेकी थिइन्। 

तर, बयान र बहसका क्रममा किशोरीले सहमतिमै यौन सम्बन्ध राखेको स्वीकारेकी थिइन्। विवाह नहुने अवस्था आएपछि रिसले बलात्कारको उजुरी दिएको उनले वताएकी थिईन।

‘मुलुकी अपराध संहिता, २०७४ को दफा २१९ को उपदफा(१) र (२) विपरीतको कसूर गरेको तथ्य स्थापित नभएको अवस्थामा प्रतिवादीले अभियोग मागदाबीबाट सफाइ पाउने र जाहेरीकर्तालाई झुट्टा जाहेरी दिएर प्रतिवादीलाई झुटा मुद्दामा फसाउने प्रयत्न गरे वाफतमा मुलुकी फौजदारी कार्यविधि संहिता, २०७४ को दफा ४४ को उपदफा(२) को देहाय (क) बमोजिम ३ वर्ष ६ महिना कैद हुने ठहर्छ,’ अदालतले फैसलामा भनेको छ।

यो पनि

बलात्कार