समाचार अपराध सुरक्षा

चन्दा नदिदाको सजाय मृत्यु, मारिए पूर्व उपप्रधानपञ्च

चन्दा नदिदाको सजाय मृत्यु, मारिए पूर्व उपप्रधानपञ्च

सरकारद्धारा प्रतिबन्धित नेशनल मंगोल अर्गनाईजेशन नामक समुहको आक्रमणमा परि गम्भिर घाईते भएका साबिक रुकुमको जाङ गाविसका पूर्व उपप्रधानपञ्च रणबहादुर घर्तिको निधन भएको छ । गत कार्तिक २९ गतेको दिन घरमै बसिरहेको बेला उक्त समुहको आक्रमणमा परेका रुकुम पुर्वको पुथाउत्तरगंगा गाउँपालिका वडा नम्बर ७ खारखोला निवासी ७४ बर्षिय घर्तिको सोमबार राति काठमाडौमा उपचारको क्रममा निधन भएको हो ।

मुखमा नकाब लगाएका, हतियारधारी ३ जनाको समुहमा आएका व्यक्तिहरुले उनीमाथी आक्रमण गरेका थिए । आक्रमणमा परेर गम्भीर घाइते भएका घर्तीलाई उपचारको लागि काठमाडौ क्रिस असपतालमा पु¥याईएको थियो ।

घरमै रहेको अवस्थामा आक्रमणकारीहरुले फलामको घन, लाठी, हम्बरले आक्रमण गरेको रणबहादुरको छोरी लक्ष्मी घर्तिले बर्ताईन् । उनले आक्रमणमा परेर आमा र आफूलाई समेत सामान्य चोट लागेको जनाईन् । उनीहरुले घरको हँसिया निकाल्दै रोईकराई गरेपछि रणबहादुलाई घाईते अवस्थामै आक्रमणकारीहरुले छोडेर भागेका थिए । उनीहरुको बोली, लगाएको बुटको आधारमा आक्रमणकारी चिनेको बताईएको छ । जानकारी अनुसार, उक्त समुहले रणबहादुरले जिम्मा लगेको बाटोको कामबाट चन्दाको लागि दवाव दिदै आएको थियो ।

आक्रमणमा संलग्न भएको भन्दै पीडितले समुहका नाईके बताउने उपेन्द्र घर्ति, चामे भनिने चक्रबहादुर घर्ति लगायत तीन जना व्यक्ति बिरुद्ध किटानी जाहेरी दिएका छन् । हाल सम्म पनि प्रहरीले उनीहरुलाई पक्राउ गर्न सकेको छैन । जिल्ला प्रहरी कार्यालय रुकुम पूर्वका कार्यालय प्रमुख प्रहरी नायब उपरिक्षक गजुसिद्धि बज्राचार्यले किटानी जाहेरीमा परेकाहरु फरार रहेको उनीहरुको खोजिकार्य भैरहेको बताए । डिएसपी बज्राचार्यले उनीहरुका गतिबिधिहरु शुन्य भैसकेकोले संगठनात्मक सहभागीता यकिन हुन नसकेको प्रतिक्रिया दिए ।

मंगोल अर्गनाईजेशनले केहि बर्ष अघि गाउँमा क्रान्ति गर्ने भन्दै चन्दा आतंक मच्चाएपछि जनआस्थामा समाचार प्रकाशित भएको थिए । त्यस लगत्तै प्रहरीले अपरेशन गरेर उनीहरुका गतिबिधि शून्य बनाएको बताएको थियो । अहिले पनि गाउँमा शिक्षक, कर्मचारीबाट नियमित लेबि उठाउने, दादागिरी गर्ने, आफू बिरुद्ध कसैलाई बोल्न नदिने जस्ता गतिबिधि उनीहरुले गाउँमा गरिरहेको स्थानीयले जनाए ।

यो सामग्री जन आस्थावाट साभार गरिएको हो ।