समाचार

जुगेडाका प्रहरी जवान साउदको पनि शव भेटियो, सामुहिक आक्रमण भएको प्रहरीको निष्कर्ष

जुगेडाका प्रहरी जवान साउदको पनि शव भेटियो, सामुहिक आक्रमण भएको प्रहरीको निष्कर्ष

कैलालीको धनगढी उपमहानगरपालिका–१२ स्थित अस्थायी प्रहरी बिट, जुगेडाका इञ्चार्ज (असई) गोविन्द विक र प्रहरी जवान रामवहादुर साउदको हत्याको अनुसन्धान निष्कर्ष नजिक पुगेको छ। 

सुदूरपश्चिम प्रदेश प्रहरी कार्यालयका एसएसपी मुकेश सिंहले हालसम्मकको अनुसन्धानले विक र साउद माथि सामूहिक रुपमा आक्रमण भएको देखिएको वताए । अनुसन्धानको दायरा साँघुरो बन्दै गएकाले मंगलवार साँझसम्म निस्कर्षमा पुग्न सकिने सम्भावना रहेको उनको भनाई छ ।

स्रोतका अनुसार घरेलु हतियारको प्रयोगबाट दुवै जनाको घाँटी काटिएको देखिएको छ । हत्यापछि केही मिटरको दूरीमा रहेको नदीमा शव फ्यालिएको पाइएको प्रहरीको भनाइ छ । घटनामा संलग्न भएको आशंकामा १३ जनालाई प्रहरीले हिरासतमा राखेको छ ।

प्रहरीका अनुसार शनिबार राति मोटरसाइकल गस्तीमा गएका वेला असई विक र जवान रामबबहादुर साउद तस्कर समूहको निशानामा परेका थिए । विकको शव आईतवार मोहना नदीमा भेटिएको थियो भने साउदको शव पनि सोहि आसपासमा मंगलवार भेटिएको प्रहरीले जनाएको छ ।

अनुसन्धानमा संलग्न एक अधिकृतका अनुसार पक्राउ परेका व्यक्तिको संकेतका आधारमा साउदको शव फेला परेको हो ।

घटनाको अनुसन्धानमा केन्द्रीय अनुसन्धान ब्युरो (सीआईबी) का प्रहरी नायब उपरीक्षक (डीएसपी) पञ्चकुमार बाखु नेतृत्वको टोली परिचालित छ । कञ्चनपुरमा निर्मला पन्तको हत्या अनुसन्धान गरिरहेको वाखु नेतृत्वको टोली सोमवार कैलालीको जुगेडा पुगेको हो ।

तस्करी रोक्न गरेको कडाइकै कारण असई विक र जवान साउदको हत्या गरिएको प्रहरीको प्रारम्भिक निष्कर्ष छ ।