अर्थ शेयर

गणपति माइक्रोफाइनान्सले पायो साढे तीन करोडको शेयर निष्काशनको अनुमति

गणपति माइक्रोफाइनान्सले पायो साढे तीन करोडको शेयर निष्काशनको अनुमति

काठमाडौं। गणपति माइक्रोफाइनान्सले तीन करोड ३५ लाख रुपैयाँ बराबरको प्राथमिक शेयर निष्काशनको अनुमति पाएको छ। नेपाल धितोपत्र बोर्डले कम्पनीलाई प्रति कित्ता १०० रुपैयाँको दरमा तीन लाख ३५ हजार कित्ता आइपिओ निष्काशन गर्ने अनुमति प्रदान गरेको हो। 

 

प्राथमिक शेयर निष्काशनका लागि गरेको क्रेडिट रेटिङ अनुसार संस्थाले केयर एनपि आइपिओ ग्रेड चार प्राप्त गरेको छ। यसले मध्यम किसिमको जोखिमको संकेत गर्दछ।

 

प्राथमिक शेयर निष्काशनसँगै संस्थाको चुक्ता पूँजी १० करोड ३५ लाख रुपैयाँ पुग्नेछ। जसमा सर्वसाधारणको हिस्सा ३२.३७ प्रतिशत कायम हुने छ भने संस्थापकतर्फ ६७.६३ प्रतिशत अर्थात ७ करोड रुपैयाँ कायम हुनेछ। 

 

धितोपत्र निष्काशन तथा बिक्री प्रवन्धकका लागि संस्थाले एनआईबिएल एस क्यापिटलाई नियुक्त गरेको छ। चालु आर्थिक वर्षको दोस्रो त्रैमाशिक वित्तीय विवरण अनुसार संस्थाले एक करोड ५१ लाख रुपैयाँ नाफा गरेको छ। संस्थाले ४५ करोड ८० लाख रुपैयाँ बरोइङ र १७ करोड ३९ लाख रुपैयाँ निक्षेप संकलन गरेर ६६ करोड ६९ लाख रुपैयाँ ऋण लगानी गरेको छ। 

 

संस्थाले २०७३ मंसिरमा व्यवसाय सञ्चालन अनुमति पाएर वित्तीय कारोबार गर्दै आएको छ। हाल संस्थाको २८ वटा शाखा कार्यालय मार्फत ९५ वटा नगरपालिका तथा गाँउपालिकामा वित्तीय सेवा प्रदान गर्दै आएको छ। 

गणपति माइक्रोफाइनान्स