समाचार

ज्येष्ठ नागरिकलाई तीर्थयात्रा गराउँदै वडाध्यक्ष

ज्येष्ठ नागरिकलाई तीर्थयात्रा गराउँदै वडाध्यक्ष

देउखुरीः दाङका स्थानीय सरकारले ज्येष्ठ नागरिकमैत्री काम गर्न थालेका छन् । ज्येष्ठ नागरिक सम्मान कार्यक्रममार्फत आर्थिक रूपले विपन्नलाई न्यानो कपडा वितरण, दिवा सेवा केन्द्र स्थापनादेखि तीर्थयात्रासम्मको काम गरेर जनप्रतिनिधिले ज्येष्ठ नागरिकको मन जित्ने प्रयास गरिरहेका छन् ।

दाङको गढवा गाउँपालिका वडा नम्बर ५ का वडाध्यक्ष प्रकाश भण्डारीले आफ्नो वडाका ज्येष्ठ नागरिकलाई लिएर पशुपति दर्शनको यात्रामा निस्किनुभएको छ । वडाध्यक्ष भण्डारीले वडाका ७० वर्षभन्दा माथिका ६५ जना ज्येष्ठ नागरिकलाई लिएर तीन दिने तीर्थयात्राका लागि काठमाडौँ लागेका हुन् । 

वडाको ज्येष्ठ नागरिक सम्मान कार्यक्रमअन्तर्गत एक लाख ६० हजार रुपियाँको बजेटबाट ज्येष्ठ नागरिकलाई सम्मानस्वरूप काठमाडौँको यात्रा तय गरेको वडाध्यक्ष भण्डारीले जानकारी दिनुभयो । विशेषगरी ज्येष्ठ नागरिकले पशुपतिनाथ, स्वयम्भूनाथ लगायतका धार्मिकस्थलको दर्शन गर्ने चासो देखाएपछि ज्येष्ठ नागरिकलाई तीर्थ लगिएको उनले बताए । 

तीर्थयात्रामा जान पाउँदा ज्येष्ठ नागरिक खुसी भएका छन् । गढवा–५ बाँकी निवासी ७२ वर्षीय दानी परियारले पहिलोपटक पशुपतिनाथको दर्शन गर्न जान पाएकामा खुसी व्यक्त गरे । पशुपतिनाथको दर्शन गर्ने ठूलो धोकोलाई वडा कार्यालयले पूरा गराइदिएको परियारले बताए । 

स्थानीय अर्का रामकुवेर यादवले जनप्रतिनिधि आफ्ना सन्तान भएर निस्किएको भन्दै आफ्नो आशीष लाग्ने बताए । गत आर्थिक वर्षमा लमही नगरपालिका वडा नम्बर ५ ले पनि वडाका ज्येष्ठ नागरिकलाई जिल्लाका धार्मिक क्षेत्रको अवलोकन तथा तीर्थाटन गराएको थियो । वडाध्यक्ष बीमबहादुर केसीले मातातीर्थ औँसीको अवसर पारेर दाङको धारापानी तीर्थ गराएका थिए । उनको कार्यबाट प्रभावित भएर यस आर्थिक वर्षमा अन्य वडा कार्यालयले पनि ‘ज्येष्ठ नागरिक तीर्थ कार्यक्रम’ योजनामा समावेश गराएका छन् ।   यो समाचार आजको गोरखापत्र दैनिकबाट लिइएको हो ।

तीर्थयात्रा वडाध्यक्ष ज्येष्ठ नागरिक

विशेष

ADVERTISEMENT