समाचार अपराध सुरक्षा

चिनियाँ नागरिकमाथि अनुसन्धान सुरु, विश्वभाषा क्याम्पसबाट बोलाइयो अनुवादक

चिनियाँ नागरिकमाथि अनुसन्धान सुरु, विश्वभाषा क्याम्पसबाट बोलाइयो अनुवादक

काठमाडौँ — काठमाडौंका विभिन्न स्थानबाट सोमबार पक्राउ परेका १२२ जना चिनियाँ नागरिकमाथि अनुसन्धान गर्न प्रहरीले अनुवादक बोलाएको छ । विश्वभाषा क्याम्पसबाट प्रहरीले अनुवादक बोलाएर अनुसन्धानलाई अगाडी बढाउने तयारी गरेको छ।प्रहरीले अनुसन्धानमा आधिकारिक बयान लिनका लागि सरकारकी क्याम्पसबाट चिनियाँ भाषा अनुवादकसँग सहयोग मागेको हो। प्रहरीको केन्द्रीय अनुसन्धान ब्यूरोका अनुसार आधिकारिक अनुवादक आवश्यक परेपछि विश्वभाषामा कार्यरत विज्ञबाट सहयोग लिन लागिएको हो।

ब्यूरोका डीआईजी निरज शाहीले आधिकारिक अनुवादकसहित विभिन्न माध्यमबाट चिनियाँ भाषा विज्ञबाट अनुसन्धानमा सहयोग लिइने बताए। नेपाल प्रहरीको केन्द्रीय अनुसन्धान ब्युरो, महानगरीय अपराध महाशाखा र महानगरीय प्रहरी परिसर काठमाडौंको संयुक्त टोलीले मनमैंजु, बाँसबारी र बूढानीलकण्ठका १० वटा घरमा छापा मार्दा गिरोहका सदस्यहरू पक्राउ परेका हुन् ।

फिलिपिन्स, कम्बोडिया, मलेसिया र श्रीलंकालगायत एसियाली मुलुकहरूमा साइबर अपराध गरेर भागेका १ सय २२ जना चिनियाँ नागरिक नेपालबाट पक्राउ परेका छन् । ती मुलुकमा धमाधम कारबाही हुन थालेपछि केही समयअघि भागेर यता आएको गिरोहलाई प्रहरीको विशेष अपरेसन टोलीले सोमबार काठमाडौंका विभिन्न स्थानबाट पक्राउ गरेको हो ।

पक्राउ गरिएकाहरूको यसअघि नेपालमा भएका अपराधमा कनेक्सनबारे पनि अनुसन्धान थालिएको छ । विगतमा सुन तस्करी, विदेशी मुद्राको अवैध ओसारपसार, दुर्लभ वन्यजन्तु तस्करी र हुन्डी कारोबारलगायत अपराधमा पक्राउ परेकाहरूसँगको सन्बन्ध खोज्न प्रहरी लागिपरेको हो ।

‘ल्यापटप र मोबाइलमा भएका तथ्य र प्रमाणहरू संकलनकै क्रममा छौं,’ ब्युरोका डीआईजी शाहीले भने, ‘सबै विवरण उतारिसकेपछि गिरोहको संलग्नता र त्यसको नेटवर्कबारे सबै विषय बाहिर ल्याउँछौं ।’ प्रमुख सहरमा बसेर विभिन्न कसुरमा दुई हजार जनाभन्दा बढी चिनियाँ सक्रिय रहेको शंका प्रहरीको छ । काठमाडौं प्रहरी प्रमुख एसएसपी सुवेदीले पहिलो चरणमा छापा मारिएकाबाहेक अन्य स्थानमा पनि यस्तै किसिमको अपराध हुन सक्ने आशंकामा निगरानी बढाइएको बताए । ‘संदिग्धको कार्यालय एकातिर, बासस्थान अर्कैतिर गरेर सक्रिय हुने गरेको देखियो,’ उनले भने ।