समाचार

कर्मचारीले घुम्न जाँदा थप १ महिनाको तलब पाउने !

कर्मचारीले घुम्न जाँदा थप १ महिनाको तलब पाउने !

जनकपुरः प्रदेश २ मा कार्यरत निजामती कर्मचारीले आन्तरिक पर्यटनमा जाँदा एक महिनाको थप तलब सुविधा पाउने भएका छन् । आन्तरिक पर्यटन प्रवर्द्धनको उद्देश्यले प्रदेश २ सरकारले कर्मचारीका लागि यस्तो व्यवस्था बनाएको हो । 

प्रदेश स्तरीय निकायका निजामती कर्मचारीको आन्तरिक पर्यटन कार्यक्रम सञ्चालन सम्बन्धी निर्देशिका २०७६ ले देश भित्र कुनै पनि पर्यटकीय क्षेत्र घुम्न जाने कर्मचारीलाई एक महिनाको तलब सुविधा प्रदान गर्ने निर्धारण गरेको छ । तर त्यस्ता कर्मचारीले निर्देशिकाले तोकेको केही दायित्व र आचारसंहिता पालना गर्नुपर्ने उल्लेख छ ।

भ्रमण सकेर कार्यालयमा हाजिर भएको सात दिनभित्र आफू घुमेको पर्यटकीय स्थल, त्यहाँको आफूसहितको तस्बिरहरुलगायत भ्रमणको विस्तृत प्रतिवेदन सम्बन्धित निकायमा पेश गरे मात्र एक महिना बराबरको थप तलब भुक्तानी हुने निर्देशिकामा जनाइएको छ  । कर्मचारी भ्रमणमा जानु अघि पनि एक महिनाको थप तलब पेश्कीको रुपमा लिन सक्ने छन् । तर, प्रतिवेदन बुझाए मात्र पेश्की लिएको रकम फर्छौट हुने निर्देशिकामा उल्लेख छ ।

सबै निजामती कर्मचारीले यस्तो सुविधा पाउन सक्ने छैनन् । यो सुविधाका लागि प्रदेश २ मा कम्तीमा ६ महिना काम गरेको हुनुपर्ने निर्देशिकामा उल्लेख गरिएको छ । निर्देशिकामा लेखिएको छ, ‘प्रदेश निकायमा हाजिर भएर ६ महिना सेवा पूरा गरेका संघीय तथा प्रादेशिक निजामति कर्मचारीहरु यस निर्देशिका बमोजिमको आन्तरिक पर्यटनमा सहभागि हुन सक्नेछन् ।’

निजामती कर्मचारी आफू कार्यरत जिल्लाबाहेक प्रदेश अथवा देशभित्रको  जुनसुकै पर्यटकीय स्थलको भ्रमणमा जान सक्नेछन् । भ्रमणमा गएका कर्मचारीले खर्च विवरण बुझाउनुपर्ने छैन । 

तलब प्रदेश २ जनकपुर

विशेष