समाचार अपराध सुरक्षा मुख्य समाचार

सुन व्यवसायी साजन मुखियाको हत्या गरेबापत साढे १० लाख ‘सुपारी’

सुन व्यवसायी साजन मुखियाको हत्या गरेबापत साढे १० लाख ‘सुपारी’

काठमाडौं । झापा बिर्तामोडका सुन व्यवसायी साजन मुखियाको हत्या गर्न १० लाख ५० हजार रुपैयाँ दिइएको प्रहरी अनुसन्धानले देखाएको छ ।


हत्या योजनाकार स्थानीय ऋद्धिसिद्धि ज्वेलर्सका सञ्चालक २९ वर्षीय पारसकुमार देवले मुखियाको हत्या गर्न दुई जनालाई १० लाख ५० हजार रुपैयाँ सुपारी दिएको खुलेको हो ।


थप दुई जनालाई देवले ‘बाँकी’ मै मुखियाको हत्यामा संलग्न गराएको अनुसन्धानमा संलग्न एक अधिकारी बताउँछन् ।
शुक्रबार भारतबाट पक्राउ परेका बिर्तामोड–३ का २२ वर्षीय राहुल भनिने राजेश शाहलाई देवले १० लाख रुपैयाँ दिएका थिए । शाह घटनापछि सुनसरीको भन्टाबारी हुँदै भारततिर छिरेका थिए ।

 

उनी समातिएपछि घटनामा बिर्तामोड–५ का २१ वर्षीय मामा भान्जा भनिने सुरज चौधरीको पनि नेक्सस खुल्यो । र, उनले ५० हजार रुपैयाँ भुक्तानी लिएको खुलेको छ ।

 

‘देवले आईएमईबाट पठाएको रकम चौधरीले इटहरीबाट निकालेको भेटिएको छ’, प्रहरी स्रोतले भन्यो, ‘उनले ३ लाख रुपैयाँ मागेको भए पनि अरु रकम पछि दिने गरी ५० हजार रुपैयाँको मात्रै कारोबार भएको भेटिएको हो ।’

 

घटनामा प्रत्यक्ष रुपमा संलग्न १९ वर्षीय दिपेश पौडेल र तेह्रथुमका २३ वर्षीय प्रकाश भनिने चिरञ्जीवी ओलीलाई भने देवले रकम दिएका थिएनन् ।

 

‘आफ्नै ज्वलर्समा कार्यरत उनीहरुलाई देवले घटना सेटल भएपछि रकम दिने आवश्सन दिएका थिए’, ती प्रहरी अधिकारीले भने, ‘चारले जम्मा २५ लाख रुपैयाँ मागेको देखिन्छ ।’

 

रेडबुलमा हाइअल्कोहल र क्लोरोफम मिसाएर साजनलाई खुवाएर बेहोस बनाई हत्या गरिएको अनुसन्धानले देखाएको छ

‘ईष्र्या नै हत्याको कारण

जिल्ला प्रहरी कार्यालय, झापाका प्रमुख प्रहरी उपरीक्षक एसपी विष्णुकुमार केसीका अनुसार साजन हत्याको मुख्या कारण ईष्र्या नै हो ।

 

‘बिर्तामोडमा रहेको साजनको दावा ज्वलर्सको आम्दानी दिन प्रतिदिन बढ्दै थियो । त्यस अनुपातमा देवको बढेको थिएन’, केसी भन्छन्, ‘छोटो समयमा साजनले हाँसिल गरेको उचाइ र उसको व्यापारमा आएको गिरावट नै हत्याको कारण भएको देखिएको छ ।’

 

साजनको हत्यापछि उसको कारोबार आफूले आफ्नो हातमा आउने सोचाइले देवले हत्या गरेको देखिएको प्रहरी बताउँछ । उनीहरुबीच आर्थिक लेनदेन पनि रहेको प्रहरीको भनाइ छ ।

 

हत्या योजनाअनुसार चार जनाले २० फागुनमा साजनलाई सुन किन्ने बहानामा बिर्तामोडको एभरेष्ट बैंक नजिक बोलाएका थिए । त्यहाँ उनीहरुले रेडबुलमा हाइअल्कोहल र क्लोरोफम मिसाएर साजनलाई खुवाएर बेहोस बनाएको अनुसन्धानले देखाएको छ ।

 

उनी बेहोस भएपछि कार्टुन बाँध्न प्रयोग हुने प्लाष्टिकको चोया र डोरीले उनको हात बाँधेर कुटपिट गरेको देखिएको छ ।

 

हत्यापछि उनको शवलाई ठेगान लगाउन देवको समूहले साजनको शवलाई जुटको बोरामा हालेर इलामतर्फ लगेका थिए ।
उनीहरुले मेची सडकखण्डअन्तर्गत इलामको रोङ नगरपालिका–३, कोल्बुङ, अर्यालचोक नजिक रहेको ठाडो भिरमा लगेर उनको शवसहितको बोरालाई लडाएका थिए ।

 

अनुसन्धानका क्रममा अपहरणमा पर्नुअघि पारस र चिरञ्जीवीले नयाँ नम्बरबाट पटकपटक संवाद गरेको पाइएपछि उनीहरुतिरै अनुसन्धान सोझिएको थियो ।

 

इलाका प्रहरी कार्यालय, बिर्तामोडका प्रहरी नायब उपरीक्षक डिएसपी कृष्ण कोइरालाका अनुसार पक्राउ परेका चारै जनाविरुद्ध मानव अपहरण तथा शरीर बन्धक, खुनडाँका र संगठित अपराधअन्तर्गत मुद्दा चलाइएको छ ।