अभिलेख

जनार्दन शर्मा कृषिका ‘जेटिए’ थिए, आफ्नै हाकिमलाई पनि टेर्दैन थिए

गलत दर्शनका कारण जनार्दन मान्छे मार्ने काममा लागे, अहिले चेत खुल्दैछ

जनार्दन शर्मा कृषिका ‘जेटिए’ थिए, आफ्नै हाकिमलाई पनि टेर्दैन थिए

मदन राई

एउटा सरकार ढल्यो, अर्को बन्यो । नेकपा माओवादी केन्द्रले केही मन्त्रीलाई निरन्तरता दिएको छ । अघिल्लो सरकारमा ऊर्जा मन्त्रालय सम्हालेका जनार्दन शर्मालाई अहिले गृहको जिम्मेवारी दिइएको छ । यसो गर्नु पछाडि एउटा महत्वपूर्ण कारण छ । त्यो के भने अब पनि राम्रो काम गरेर माओवादीले आफ्नो शाख जोगाएन भने यो पार्टी समाप्त हुन्छ भन्ने उसले बुझ्यो । यहि भएर जसरी भए पनि राम्रो काम गर्नेलाई निरन्तरता दिन खोजेको जस्तो लाग्छ ।

जहाँसम्म जनार्दन शर्माको कुरा छ, यिनी त कृषिका चेला हुन् । चार सय अंकको एसएलसी पास गरेर जुनिएर टेक्निकल एसिस्टेन्ट (जेटिए) बनेका थिए । शर्माको कपि मैले नै चेक गरेको थिएँ । यसकारण जनार्दन मेरा त चेला हुन् । जेटिए भएपछि उनी रुकुमको एक तरकारी फारममा काम गर्न थाले । उनका हाकिम थिए लक्ष्मण पुन । पुन अहिले युएनडिपीमा जागिरे छन् ।

तरकारी फारममा काम गर्दैदेखि मैले जनार्दनमा अलिकति ध्यान दिन थालेको थिएँ । यी अत्यन्त विद्रोही स्वभावका थिए । धेरैले त यिनलाई छुच्चो पनि भन्थे । कुरा चित्त बुझेन कि ठोकी हाल्ने स्वभाव थियो यिनमा । अरुले पनि ‘यो जनार्दन कति छुच्चो हो ?’ भनेको सुन्थे । उनले आफ्नै हाकीमको कुरा पनि सुन्दैन थिए । तर मान्छे पहिलेदेखि नै टाठो थिए ।

यिनी संसदमा कुर्सी भाँच्नेदेखि मान्छे मार्ने हिंसात्मक युद्धमा पनि लागे । अहिले बल्ल यिनको चेत खुलेको छ । माओवादीहरुको अलि अलि बुद्धी आउँदैछ । राष्ट्रको लागि आर्थिक समृद्धि आवश्यक छ भन्ने बुझ्दै छन् । विध्वंश मात्रै गर्न जानेका माओवादीहरुले फाटफुट अब राम्रो काम पनि गर्न थालेका हुन् कि जस्तो देख्दैछु । यो झुक्किएर भएको हो भने त म केही भन्दिनँ ।

अब यी जनार्दन शर्माकै कुरा जोडौं । यी मान्छे उग्र छन् । दिएको काम भने जसरी पनि फत्ते गर्ने स्वभावका छन् । यहि भएर यसपटक ऊर्जामा यिनले राम्रै गरे । तर अब अर्को परीक्षाको घडी आएको छ ।

हाम्रो देश, समाजको विकृतिको मूल भनेको गृहमन्त्रालय हो । त्यो मन्त्रालय नसुध्रेसम्म केही हुनेवाला छैन । अब जनार्दन शर्माले फरार अपराधि, गुन्डा, बदमास, हप्ता असुली, तस्करी, राजनीतिको आवरणमा देश विरोधी क्रियाकलाप गर्ने, विखण्डनवादीहरुलाई कसरी छानीछानी ठोक्छन् मलाइ हेर्न मन छ ।
यो काममा पनि जनार्दन शर्मा सफल भए भने उनी वास्तवमै पास भएको मान्नु पर्छ । यसअघि बुद्धी बिग्रेर मान्छे मारेको दोष कटाउने बेला यिनले पाएका छन् । यो अवसरलाई यिनले सदुपयोग गर्न सक्छन् कि भन्ने मेरो अपेक्षा छ ।

म जुन पार्टीको, जुन विचारधाराको मान्छे भए पनि राम्रो काम गरेकोलाई राम्रै भन्छु । नराम्रो गरेकाहरु मेरै पार्टीको भए पनि बाँकी राख्दिनँ । किनभने म त एउटा व्यक्तिको लागि राम्रो बनिन, एउटा टोल, गाउँ बनाउन आएकै होइन । म त देश राम्रो बनाउन राजनीतिमा आएको हुँ । यसकारण मलाई कसले के भन्छ भन्ने कुरा मतलव छैन ।

मैले यसो किन भनेको भने, माओवादीबाट बाबुराम भट्टराई निस्केपछि त्यो पार्टी अब प्राणविनाको पार्टी भएको छ । कुनै पनि पार्टीको प्राण भनेको उसको आर्थिक एजेन्डा हो । बाबुराम निस्केपछि माओवादीको आर्थिक एजेन्डा समाप्त भइसकेको छ । अब यो पार्टी प्राण बिनाको पार्टीमा सिमित भएको छ । यसैकारण माओवादीले आफ्नो अस्तित्व रक्षाको लागि विभिन्न तिकडम गर्दै आएको छ ।

खुराफाती होइन, काम गर्ने वातावरण सरकारमा बसेका जिम्मेवारहरुले बताउनु पर्छ । विकास त देशवासीले गर्ने हो सरकारले होइन । सरकारको काम त सहजीकरण गरिदिने मात्रै हो । सडक राम्रो बनाइदिने र सुरक्षा राम्रो दिने हो भने देश बनाउने काम देशवासीको हो । ‘कुनै पनि किशिमको असुरक्षा हुँदैन । मज्जाले लगानी गर्ने, उत्पादन गर्ने हो ’ भन्ने भावना स्थापित भएपछि देश आफै बन्छ । सुरक्षाको ग्यारेन्टी सरकारले गरिदिनु पर्छ । आधुनिक समयमा हुनु पर्ने यहि हो ।

(राई नयाँ शक्तिका नेता तथा कृषि वैज्ञानिक हुन् । यो लेख उनीसँग गरिएको कुराकानीमा आधारित हो ।)

 

विशेष

ADVERTISEMENT