मुख्य समाचार

१० स्थानीय तहको निर्वाचन परिणाम आयोगलाई प्राप्त

१० स्थानीय तहको निर्वाचन परिणाम आयोगलाई प्राप्त

आइतबार सम्पन्न स्थानीय तह निर्वाचनको पछिल्लो मत परिणामनुसार १० स्थानीय तहको निर्वाचन परिणाम आयोगलाई प्राप्त भएको छ ।

निर्वाचन आयोगका अनुसार तनहुँको बन्दीपुर गाउँपालिका, मनाङका चामे गाउँपालिका, नाशोङ गाउँपालिका र नेस्याङ गाउँपालिका, बाग्लुङ जिल्लाको तमानखोला गाउँपालिका, मुस्ताङका घरपझोङ गाउँपालिका, थासाङ गाउँपालिका, दालोमे गाउँपालिका, बाह्रगाउँ गाउँपालिका र लोमाथाङ गाउँपालिकाको निर्वाचन अन्तिम परिणाम प्राप्त भएको हो ।

विभिन्न कारणले मतदान स्थगन भएका काभ्रेपलाञ्चोकको नमोबुद्ध नगरपालिका, दोलखाको मेलुङ गाउँपालिका, भक्तपुरको चाँगुनारायण नगरपालिका, कालीकोटको नरहरिनाथ गाउँपालिका र कालिका गाउँपालिकामा मतपत्र च्यातिएको, मतदान केन्द्र तोडफोड भएको, निर्धारित मतपत्रभन्दा फरक मतपत्र
परेको, कर्मचारीमाथि आक्रमण भएको र झडप भई मृत्यु भएको समेतका कारणले मतदान स्थगन भएका हुन् ।

हिमाली जिल्लाका केही मतदान केन्द्रको मतपेटिकास्थल मार्गबाट सङ्कलन गर्न कठिन भएकाले आज बिहान हुम्ला जिल्लाको नाम्खा गाउँपालिकाका तीन मतदान केन्द्रको मतपेटिका हेलिकप्टरबाट ल्याइएको छ । ती स्थानको मतगणना आजैदेखि सुरु हुने आयोगका प्रवक्ता सूर्यप्रसाद शर्माले जानकारी दिए ।

मुलुकका तीन प्रदेशका ३४ जिल्लामा भएको मतदानको अहिले २५७ स्थानीय तहमा मतगणना भइरहेको जानकारी आयोगमा रहेको संयुक्त निर्वाचन परिचालन केन्द्रबाट प्राप्त भएको छ ।

स्थानीय तहको निर्वाचन निर्वाचन आयोग