राजनीति भिडियो

‘देउवाले गर्नै नहुने काम गरे, जे गरे गलत गरे’ (भिडियोसहित)

‘देउवाले गर्नै नहुने काम गरे, जे गरे गलत गरे’ (भिडियोसहित)

विश्वकान्त मैनाली वरिष्ठ अधिवक्ता एवं नेपाल बार एसोसिएसनका पूर्वअध्यक्ष हुन् । मैनालीसँग नेपाल आजले मन्त्रिपरिषद बिस्तार, मंसिरमा हुन गइरहेको केन्द्र र प्रदेशको निर्वाचन तथा एमाले र माओवादीबीचको चुनावी तालमेलको बारेमा छोटो कुराकानी गरेको छ । कुराकानीको सम्पादित अंश उनकै शव्दमा

–आज शनिबारदेखि संसदको अन्त्य भएको छ । संसद्को अन्त्य भएकाले आजैदेखि वर्तमान सरकार कामचलाउ सरकारमा परिणत भएको छ । यसले दीर्घकालीन महत्व राख्ने नीति तय गर्न सक्दैन । यो सरकारको काम भनेको अब मुलुकको दैनिक प्रशासन चलाउने, शान्ति सुरक्षा कायम गर्ने र निर्वाचन गर्ने मात्रै हो । कामचलाउ भइसकेकाले यो सरकार अब दायाँ बायाँ जान सक्दैन ।

–प्रधानमन्त्री शेरबहादुर देउवाले निर्वाचन आचारसंहिता जारी भइसकेको अवस्थामा सरकार विस्तार गर्न मिल्दैनथ्यो । उनले यसअघि पनि सरकार बिस्तार गरेका थिए, जसमा निर्वाचन आयोगले असन्तुष्टि जनाइसकेको अवस्था छ । तर उनले फेरी मन्त्रिपरिषद बिस्तार गरेका छन्, यो हुनै नहुने काम हो । उनले राष्ट्रिय प्रजातन्त्र पार्टीका अध्यक्ष कमल थापालाई सरकारमा ल्याएर गलत काम गरेका हुन् । उनले चुनाव जित्नका लागि थापालाई सरकारमा ल्याएका हुन् । वास्तवमा उनले जे गरे, गलत काम गरे ।

–संसदको अन्त्यसँगै देउवा सरकार काम चलाउ भइसकेकाले अब निर्वाचन हुँदैन भनेर आशंका गर्नुपर्न म देख्दिन । वास्तवमा साँचो कुरा के हो भने संसद अन्त्य भएकाले निर्वाचन हुन्छ हुँदैन भनेर बहस गर्नु नै ठीक होइन । किनभने, देउवा सरकार काम चलाउ भइसकेकाले यो सरकारले अब निर्वाचन सार्नै सक्दैन । बरु हिजो संसद भएको अवस्थामा सक्थ्यो । अर्काे कुरा, राष्ट्रिय अन्तर्राष्ट्रिय परिस्थिति पनि निर्वाचनको पक्षमा छ । त्यसैले कोही पनि निर्वाचनबाट भाग्न सक्ने अवस्था छैन ।

–वास्तवमा अहिले एमाले र माओवादी केन्द्रबीच चुनावी तालमेलसहित चुनावपछि पार्टी एकीकरणको जुन कुरा चर्चामा छ, यो समयको माग हो । यो वामपन्थी तालमेललाई हिजोको कम्युनिष्ट पार्टीको आँखाले हेर्न मिल्दैन । यो परिस्थितिको उपज हो । यसलाई अन्यथा लिनु हुँदैन । यसलाई सकारात्मक रुपमा हेर्नु पर्छ । तर एकीकरण सजिलो छैन । राजनीतिक स्थिरता ल्याउने हो भने एकीकरण जरुरी छ । समान विचार र कार्यक्रम रहेका दलहरु धु्रवीकरण हुन जरुरी छ । लोकतन्त्रको निम्ति यो हितकारी पनि छ ।

Biswakant Mainali