अर्थ देश

म्याग्दीबाट ४५ करोडको आलु निकासी

म्याग्दीबाट ४५ करोडको आलु निकासी
कात्तिक - ८ । पहाडी जिल्ला म्याग्दीबाट एक वर्षमा ४५ करोडको आलु निकासी भएको छ । आव २०७२÷७३ मा जिल्लामा उत्पादन भएको आलुमध्ये ११ हजार ७६१ मेट्रिक टन आलु जिल्ला बाहिर निकासी गरी कृषकले ४५ करोड आम्दानी गरेको जिल्ला कृषि विकास कार्यालयले जनाएको छ । जिल्लाका विभिन्न गाविसमा उत्पादन भएको आलु कृषकले पोखरा, काठमाडौँ, कुश्मा, बागलुङलगायतका स्थानमा पुर्याएर बिक्री गरेको वरिष्ठ कृषि विकास अधिकृत श्यामप्रसाद रिजालले जानकारी दिए। जिल्लामा हिउँदे र बर्खे गरी एक हजार ६ सय १५ हेक्टर क्षेत्रफलमा आलु खेती हुँदै आएको छ । जिल्लाभर वर्षभरिमा कुल १६ हजार पाँच ७६ मेट्रिक टन आलु उत्पादन भएको थियो । त्यसमध्ये चार हजार ८१५ मेट्रिक टन आलु जिल्लाभित्र खपत भए पनि बाँकी आलु यातायातका साधनमार्फत ढुवानी गरी जिल्ला बाहिर निर्यात गरिएको हो । अघिल्लो वर्ष एक हजार ६०५ हेक्टरमा गरिएको आलुखेतीबाट १५ हजार ९०० मेट्रिक टन आलु उत्पादन भएकामा यो वर्ष शून्य दशमलव ६ प्रतिशतले उत्पादनमा वृद्धि भएको कार्यालयकी योजना अधिकृत ज्योति क्षेत्रीले जानकारी दिए। कृषकहरु व्यावसायिक बन्नु, उन्नत जात भित्रनु, पुरानो खेती प्रविधि आधुनिकीकरण बन्दै जानु, अनुदानका कार्यक्रम, बीउ आलु भण्डार गृह निर्माण, बजारको पहुँच विस्तारले अन्य बालीको तुलनामा सजिलो र आम्दानी हुने भएकाले आलु खेतीतर्फ कृषकको आकर्षण बढेको अधिकृत क्षेत्रीले बताए। राम्चे, हिस्तान, शिख, घार, कुहुँ, कुइनेमङ्गले, पाखापानी, मल्कवाङ, गुर्जा, मुदी, मल्कवाङ, चिमखोला, पात्लेखेत, भकिम्लीलगायत ३३ गाविसमा व्यावसायिक आलु खेती हुने गरेको छ । अन्य अन्नबालीको तुलनामा धेरै समय, जनशक्ति र मेहनत नपर्ने तथा बजारमा उच्च माग भएकाले म्याग्दीमा व्यावसायिक आलु खेती गर्ने कृषकको सङ्ख्या बढेको हो । कृषकले कुफ्रेज्योतिका साथै दाना (पिबिएस) र बियाँ बीउ (टिपिएस) प्रविधिको प्रयोग गरी उन्नत जातका आलुको खेती गरेका छन् । घरायसी उपभोग, आन्तरिक बजार, बीउ आलुका लागि म्याग्दी जिल्ला आत्मनिर्भर बनेको जिल्ला कृषि योजना अधिकृत क्षेत्रीले बताए। आलु खेतीको प्रवद्र्धनका लागि जिल्ला कृषि विकास कार्यालयले बीउ आलु आत्मनिर्भर कार्यक्रमका साथै सुरक्षित भण्डारणका लागि विभिन्न १० ठाउँमा शीतभण्डार भवन निर्माण गरिएको कार्यालयले जनाएकोे छ । यसैगरी कृषकलाई प्राविधिक तालिमका साथै अनुदानमा बियाँ र दाना बीउ आलु उपलब्ध गराउने गरिएको छ ।

potato market in nepal