हाम्रो पात्रो विज्ञापन
समाचार मेरो परिवार मेरो कथा

बम दिदीबहिनी न्याय खोज्दै काठमाडौंमा, भन्छन् ‘लाञ्छना सहेर कति बस्ने ?’

बम दिदीबहिनी न्याय खोज्दै काठमाडौंमा, भन्छन् ‘लाञ्छना सहेर कति बस्ने ?’

काठमाडौं । कञ्चनपुरकी निर्मला पन्तको बलात्कार र हत्या घटनामा जोडिएका बबिता र रोशनी बमले आफूहरूमाथि अन्याय भएको बताएका छन् ।

आमासँग काठमाडौं आएका उनीहरूले उक्त घटनामा जोडेर आफ्नो चरित्र हत्या गरिएको, घटनामा संलग्नता प्रमाणितै नभई मिडिया र मानव अधिकारकर्मीले निरन्तर लाञ्छना लगाएको बताए ।

रोशनीले निर्मलाको बलात्कारपछि हत्या भएको घटना सार्वजनिक भएपछि प्रहरीका विभिन्न टोलीलेआफ्नो घर खानतलासी गरेको र कैयन्पटक बयान लिएको बताइन् । उनले बाहिर चर्चामा आएजस्तो प्रहरीले आफ्नो पक्ष नलिएको दाबी गरिन् । ‘हामीसँग सोध्दै नसोधी चरित्र हत्या गर्ने र तथानाम लेख्ने–बोल्ने काम भयो,’ उनले भनिन् । पहिलोचोटि एक दिन र दोस्रोचोटि ६ दिन आफूलाई हिरासतमा राखिएको, दिदी बबितालाई पहिलोचोटि २ दिन र दोस्रोचोटि १८ दिन हिरासतमा राखिएको उनले बताइन् । भनिन्, ‘बारम्बारको अनुसन्धानले हामीलाई दोषी देखाएन । केही मानव अधिकारवादी संगठनले झूटा प्रतिवेदन बनाए ।’

नेपाल मानव अधिकार संगठनले २०७५ असोज ६ गते सार्वजनिक गरेको प्रतिवेदनतर्फ इंगित गर्दै उनले भनिन्, ‘हामीसँग भेटदै नभेटी उक्त संगठनले हामीलाई ओपेरा होटलको डान्सर बनाइदियो ।’

घटनालगत्तै संगठनले निकालेको प्रतिवेदनमा बबिता ओपेरा होटलमा डान्सर रहेको उल्लेख थियो । बलात्कार र हत्या घटनापछि आफूहरू सार्वजनिक जीवनमा फर्किन नसकेको दुखेसो उनीहरूले पोखे । सामाजिक सञ्जाल, युट्युब च्यानल र सर्वसाधारणबाट समेत आफ्नो चरित्रमाथि औंला उठाइँदा निरीह बन्नुपरेको उनीहरूले बताए ।

घटना सार्वजनिक भएपछि रोशनी स्कुल गएकी छैनन् । आमा इन्द्राले छोरीलाई अर्को विद्यालय सार्न खोज्दा विद्यालयले स्थानान्तरण प्रमाणपत्र नदिएको बताइन् । बबिताको पनि हिरासतमै रहेका बेला बीबीएस दोस्रो वर्षको परीक्षा छुटेको उनले जानकारी दिइन् । यो खबर आजको कान्तिपुर दैनिकबाट लिइएको हो ।

निर्मला पन्त